IMG-LOGO
Accueil Actualités Rachad : abrid n tilas
Publié le : 14 Mars, 2020 - 20:40 Temps de Lecture 8 minute(s) 789 Vue(s) Commentaire(s)

Rachad : abrid n tilas

IMG

Aguren agi ineggura snat tmucuha ččant internet. Yiwet tugi awal ɣef takti n tsertit, tayeḍ tebɣa attesderɣel amezruy af ayen xedmen imselmanen di tillas n 90at. Win ibɣan ad isgugem ilsan d walaɣen d Rachad. Γures afus, tadrimt d wayen isi ara yeṣiweḍ ar wanda ig ttmenni. Tamselmant tuɣal-d, adabu iga tameɣra. D ayen kan ig ttṛaju i wakken ad iwwet amek ara iseftutes tugdut tatrat ig sduklen aɣref si 22 fuṛaṛ.

Di tugdut yal amdan, yal akabar ɣures azref ad yili, ad imeslay. D acu kan, win yuɣen abrid agi, ulac iɣil, ulac tufra. Tella yiwet ilaq a-tt i-d nini si tazwara : ma nmuqqel amek ddant tlufa, annwali takemmict agi tebɣa a-d sali akabar niḍen af ixeṛban n FIS…s txezabit. Acuɣer ?

Yir aẓar

Akken ibɣu yilli, imeɣnasen n FIS ur ttwaqnen ara yakw ar beṛṛa am wid n Rachad. Wigi zgan di temliliyin n imselmanen n dunnit meṛṛa ( Uṛup, Ṭurk, Qaṭar…). Annect agi izmer a-t iqbel wemdan ; d acu kan mara d yeffeɣ yiwen ad isewweq s yissem n wegdud neɣ win n tagrawla, ilaq a-ɣ i-d yini anwa i-s-d imicriwen, ansi i-d ittagwem imeslayen is, acku, ass agi taluft tebeddel annar. Di 90at, ɣas akkaen seggxen tamurt, ɣas awal nsen d ameṣṣuḍ, amur ameqwran seg wid illan di FIS, iqqim asen-d cwiṭ uẓar azayri. Ass a, Rachad atan d arbib n temselmant taberranit ; tin ikkaten amek ara tesdṛeɣel igduden uqbel ad ten sefsi di tmuɣli ines.

Akabar agi isɛa s wacu ara iseqdec aṭas n yemdanen si beṛṛa n tmurt; wa d imzeggi, wa d amestajeṛ. Xas akken ura s yeshil wara, si 22 furar atan la ikkat amek ar yegger tucar di tmurt. Ṛachad ɣures diɣen aṭas n tɣawsiwin isalan : tilibizyunat, web, ixxamen n umeyyez, timiliyin…ala jebbden iḍ d wass i wakken ad ṛeṣṣint udem n temselmant tuqsiḥt. Γursen acengu iban : kra n win ittnadin a-d yessifrir tafat ɣef tugdut, ilaq ad iluɣ wawal is. Tagi iselmed aɣ tt umezruy : d asluɣu ig ttakken afud i wdabu n ɣiɣil.

Rachad yuɣ-d aẓar di terkafin tifaciyin i-d ibanen deg segwasen n 30. Si yiwet tama a-d summen kra n wayen tezmer a-t i-d tefk tugduda, si tama niḍen ad zerɛen tisiqas is’ara yewwet umeɣnas neɣ umɛîwen « akafriw ». Ass agi, Rachad, atan di tumra n Urup. Dina, ur yessawal ara ar tmettant n wid iɣran am akken ixeddem FIDA zik nni. Ur yettbib’ara tiyitwin neɣ acekkem imegdayen; d acu kan, werǧin ad isel wednan yeffeɣ-d degs wawal megdal tiyitwin agi.

Iseggawasen agi ineggura, necfa yakw asmi i-d isawel yiwen wemcum ar tmegreṭ n Kamal Daoud. Rachad isla, isusem. Di tagara yagi, atenad ɣlin-d diɣen af umyaru Amin Zaoui. Izwar-d fellas yiwen seg wigi isfuṛuyen tirga nsen di internet. Sin imeṣṣaḍ nni i-d yi-d yaɛnan di Maṛsay di nubembeṛ, qnen ula d nutni ar Rachad. Yiwen d ameɣnas, wayeḍ d aqeddac ittleqimen ameslay nsen. Azekka nni, isalan imselmanen, garasen Al Maghribia, zerɛen meṛṛa tacmatt nsen. Slufen i « yergazen » ig snebcen acengu. Di Paris, ɣef ufrag n Republique, yiwen ilemẓi i-d yerran awal i Rachad, ddan-tt fellas ula d netta.

Di tmurt n Leqbayel atenad gren aẓeṭṭa yakw d wid isaramen a sen gren irebbi. D tilibizyun nsen ig ttɛellinqen ciɛat i wid i-d « yuɣalen » s abrid. D acu kan, mi-d tiwweḍ tidett, Rachad yettuɣal din ar tid is. Tasɣunt « Taɣeṛma », yellan d tawḥiṭ di tmaziɣt, atan icekel itt udabu ig ugin isekkilen n laṭinit, wid nni isi yettaru Ṭurk. Rachad ur yegz’ur yesli, yeqqen yimi-s lḥenni. Amin Zawi i-d yegren tiɣri af ssem amselman imɣen af tamurt n Leqbayel, ɣures lḥeq. Mad yekcem ujeǧǧiḍ agi ar dina, Lezzayer tamagdayt d asiwen kan ara tt iganin. Taxezzabit taneggarut, dduṛt agi iɛeddan, d imsulta ig regmen tilawin d yefɣen s abrid. Nnan asent amkan nkwent deg wexxam. Wid i ten snen, nan-d imsulta yagi d iqeffafen n Rachad.

Ikcem ssus di leǧdra.

Tasertit m sin wudmawen, rran-tt d tafellaḥt nsen.

Si tama imeɣnasen la ttmeǧǧiden af lɛesker iččan tamurt, si tama niḍen Rachad iga taxxami yakw d Gaïd Salah. Izzayriyen nzan ur ḥsin. Izmer ad yili seg wasmi yemmut wina wukud ttemsewwaqen, qnen diɣen ar win i-d yuɣalen deg wemkan is. Ar berra, ala qqaren d nekwni i d icenga nsen. Rachad ur yebɣ’ara ad ittwakkes udabu, isaram a-t yeṭṭef.

Mačči d yiwet att i-d yawi wemdan ɣef at sin wudmawen agi. Iwwin-d lmitaq sɣur wid yeqqaren tasertit d akellex.

Tarewla ɣef tidett

Γef acu i-d kkren wigi ? Imedya agi i-d nefka, seknen-d ayen i sen yellan deg wallaɣ. Imexlaq agi anida qnen i bran. D ayen d nnan d wayen xedmen di 90at i saramen ar ass a. D acu kan tura, uɣen-d abrid s tufra. Zik nni imeḍbṛen imselmanen nnan-d ayen isen yellan deg wul uqbel ad awḍen ar udabu. Ass agi sburren i wayen i-d ttheggin. D ayagi ig laq a-t iwali bab is. Tin i tent yugaren yakw, d akken kra imagdayen sersen tagcrirt zdat sen. Qeblen tasusmi ɣef tugdut, yilli imselmanen saḥman amendayer af tmuɣli nsen d wagu isi bɣan ad fren tiwaɣiwin isi sgujlen tamurt di 90at.

Ilaq aɣ a-t i-d ninni ass a d uzekka. Ayen isutur Uzzayri uqbel tifranin, d abrid. Ilaq lsas n Lezzayer tatrart ad yilli d win ara yizmiren i wexxam uzekka. Isafaren n tugdut, yiwen ur izmir a ten iɣum, a ten yettu. Tilelli umeslay, azal n tmeṭṭut zdat wergaz, izerfan n wemdan, asinef n ddin ɣaf tsertit…d zzeṛb ɣef telilli, d tacḍaṭ i tidett timzeggit. Annect agi ur yelli d tikti tazelmaṭ ur yelli d tin uyefus. Annect agi ur yelli d awal ugafa, ur yelli n lɣeb, n wenzul, ur yelli n cceṛq. Isafaren agi am tafat, am aman d ubeḥri : ɣursen i teqqen tmeddurt. Yal amagday, ma zeddig wul is, ma yenwa talwit, tiwi yas-d ad ibed ɣaf tɣwemmaṛ agi . Mi rekdent tlisa n tugdut, tasertit a-d taf abrid is. Yal yiwen a-d yini awal is di tdamsa, di tudert n wemdan, deg yedles… Iezerfan imagdayen mačči d tasertit. Di tugdut rsen di tazwara usirem n wemdan.

Ass a imselmanen ur zmiren ara a-d inin tugdut « kufr ». Lla kkaten amek ara sqedcen tugdut i wakken a-tt meḍlen s isufar ines. Akken bɣun mdeṛkallen Rachad neɣ Ḥamas ; tirkafin timselmanin i meṛṛa, tamuɣli nsent yiwet. La ɣ-d qarren : adabu yeǧǧa yaɣ taɣuri, leǧwamaɛ, isalan d izerfan. Tura igelliden n cceṛq alemmas neɣ Ṭurk fkan a-ɣ s waccu ara nesluɣ ameslay n tugdut. D lawan annazel ar tefranin mebla cweṛ, mebla aḥebber. D annect agi is sawḍen Hitler ar udabu. Ayen i-d yellan deffir-s, ẓran t yakw medden. Tifranin mebla isufar imegdayen mačči kan d inig ar tillas, d ajajiḥ deg wexxam n tasertit.

Yir abrid

D tikerkas agi umi d yeqqim yiwen seg wigi ittednen i Rachad di internet ass n 6 di meɣres. Ass ni yekker-d ar wesqujen, yaɛna yid nek s yissem iw. Lemmer ur d yessaweḍ ara ar ucekkem, lliɣ ttakeɣ d tikta inu dagi ɣef tlufa n tmurt s umata. Imi iyi d gren deg wemdun nsen, ilaq ad ner i lekdeb s tidett. Ur tabaɛeɣ ara ameddaḥ agi nsen ar tegrut n temsulta anda i-d yefruri. Ad a-s i-d nesmekti kan asmi yettṛebbi tasemt deg dabu i-t icegɛen ar berra n tmurt, llan yergazen d tilawin iǧǧan tarwa, axxedim, llan wid ifkan tameddurt sen i wakken yal yiwen ad yidir di tlelli di tmurt is.

Tura mi dukklen Izzayriyen, Rachad ibɣa a-d isbur i temselmant i-ɣ isgujlen di 90at i wakken a-tt i-d leqqem af tegrawla n 22 fuṛar. Lemer i sent tella tmurt deg wul, ad ṭṭfen cwiṭ iman nsen di tegwnitt icban tagi. Idamen yuzlen di 90at, ilaq a d asen qimen wid isnen d wid yuklalen; akka ara-d bin tidett ara yeseḥlun agdud. Tiddett ugin-tt. Tikerkas uɣent di tsertit n temselmant.

Ameddaḥ agi yečča-t yimi-s. Aḍebbal ur itt’ara ahuzzu n tuyat. Ibɣa ad izuɣeṛ awal iw ar wurrif n wid yettamnen. Tidett tugar taqabact. Asmi sersen irebraben lbumba deg wennar n Lezzayer, ass n 26 ɣuct 1992 i-d yeglan s 8 temgṛaḍ d 128 imejraḥ, ṭfen asen s lmut. Yal medden ḥsan d accu yellan gari d yemcumen agi. Lliɣ seg wid i-d yeskecmen amennuɣ n talwit di tumurt yečča yiɣil d lekdeb. Γuri tugdut d taɣawsa, d asirem. Γas d ixṣimen iw, xas ḥṣiɣ nudan a yi nɣen acḥal n tikal, uriɣ tabratt ar wexxam n tegduda i wakken ur neqqen ara irebraben nni. Ddiɣ d wayen yellan di tsersit isi yumneɣ, ddiɣ d wayen i-yi-d yenna wul iw. Ugiɣ ad mten irbraben axateṛ ayen bɣun xedment, d imdanen. Amdan ur ineq amdan. Rachad yerra tacḍiṭ af imeslanen yessawalen ar tmettant imeɣban, ɣas ur ten d yiww’ ara umeddaḥ di tqeṣṣiṭ.

Uqbel annessali awal ɣef tfextin agi isi bɣan ad sbiben i wiyiḍ tawaɣit n 90at, ilaq diɣen a-d nesbed tidett zdat lekdeb. Ass nni ideg i-d fkan amek teffeɣ tefrant n dujembeṛ 91, nniɣ di rradyu tis tlata ma yella annect agi yeffeɣ-d deg senduq, yal yiwen ilaq a-t yeqbel. Alarmi d asmi i-d nan yemḍebren n FIS sya d asawen ulac awal, ulac tugdut i-d nniɣ « ur tedduɣ ara d aqfaf ar temḍelt n tmurt inu. » Ar ass a aqliyi deg wawal nni. Tugdut mačči d adabu n yiɣil.

Iseɣ i tmurt

Ma llan imselmanen yessaramen a-d ddun deg ǧuǧeg agi refden yelmeẓyen d tilawin seg wass n 22 fuṛar ar ass a, zemren ad kecmen ar umezruy ma qeblen ad illin d aḍref n tsertit ger wiyiḍ igan leqrar i tugdut. I wakken ad awḍen ar din, ilaq ad ksen tifextin agi i yuddin i tegduda. Ass a tamselmant tasertit teffeɣ deg mezruy. Izmer laɛsker ad isagwed yes agdud iwakken ad iqqim deg dabu.
Aɛsekṛiw isagwad s wemselman, amselman isagwad s uɛsekriw. S yiwen wawal : aɛsekriw d umselman, d snat tuɣmas : lkwellab yiwen. Tirkafin timselmanin neṭḍent yakw ar lɛeskeṛ. Am Rachad, am Ḥamas, am wiyiḍ, abrid yiwen. Zemren a-d ɣlin ixeclawen garasen ma walan yiwen izwar wayeḍ ar tbaqit.

Ma d nek nniɣ-d awal iw deg assen imezwura n tnekra n 22 fuṛaṛ. Azekka n tmurt yurez it Gaid Saleh. D netta ig zemren ad icekkel tagrawla. Tissas d tegmatt refden warraw nneɣ tettalas aɣ tidett agi. Nniɣ tt i-d di tegwnitt ines.

Yal yiwen izmer a-d yakwi. Tagrawla lla tleḥḥu. Tamselmant tezmer a-tt tebbi, tezmer att-tesluɣ. Ur tezmir ara a-tt tečč. Wissen ma llan yergazen neɣ tilawin ara yenhun garasen i wakken ad uɣalen d isertiyen am nutni am wiyiḍ.

D lawan yal amdan ad iḥsu mačči ḥaca tamselmant d laɛskeṛ ig llan di tmurt nneɣ. Assa iger-d iman is wis tlata. Issem is « agdud azzayri ». Γas a-sen-d as ẓayet i kra, tura ilaq ad lemden ad ḥesben ar tlata.

Tikti taneggarut i wid idarayen tili nsen i wakken a-d ttektilin tidi n medden. Izmer a-d fɣen kra degsen mi ɣran tiɣri yagi; ad a-k inin d ayan ara iferqen tagrawla; yili gugmen mi d infel wasif n lekdeb ibɣan ad icelqef deg zal qayli asirem n tnekra n 22 fuṛar. Agdud atan ideb deg webrid, atan izdi lqed is di lehbus d wexxam n ccraɛ. Tadukli- ines teḍmen. Ayen ifeṛqen d tasusmi, d asexleḍ ; mačči d tidett.

Win iɣran akken iwulen ayen itteddun zdat wallen nneɣ, a iḥṣu d accu ara-d yettlalen ass a. D amezruy atrar ; d ayen ibennun tagduda n liser, n tafat d usirem i-d yeflalin. Win yunafen di tegwnitt am ta, atan seg wid ifkan allaɣ nsen i tillas.

Di tagara

Am Rachad am terkafin niḍen yettmennin ad selɣen tamurt s qaḍran, fellasent snat tuttriwin kan.

  • Tettikim neɣ ala deg sirem isawallen i Lezzyer yugin adabu n yiɣil ? Ma teddam-d deg wawal agi, ilaq attrefdem isufar n tugdut i meṛṛa. Wigi zwaren yal tafrant.
  • Tettikim neɣ ala, ma nessers-d imdanen iwulmen, wid isnen i wakken ad nadin di tlelli d tafat ɣef ayen yeḍran di 90at. A-d bin tidett, a-d nessali azref n yal amdan ?

Ur tezmirem ara attqeṛnem win izellun ar win imezlen. Annect agi ur yecbiḥ ur yettwaqbal.

Win iregwlen ɣef snat tuttriwin agi, ḥsu-t kan d aqfaf udabu. D taqabact isi igezzem ifaden n wegdud yal tikelt ideg ara-d iffeɣ megdal is.

Tagrawla tɛawed lǧerya. Adabu n yiɣil, takweṛḍa isekfen tamurt, aqemmeṛ n ddin, timtellet agi fi yebna udabu si 62, assa a yugi-tt umezruy.

Tanekra n 22 fuṛaṛ, tugar tin n 54 di telqeyt. Ǧgan-tt i-d imezwura : ugar anamer n yiman is wala aseɣeli ucengu.

Ilmeẓyen rẓan asalu. Anneddu neɣ annemḥu.

Laissez un commentaire